بۆ یەکەمجار سوریا بڕیاریدا مەرجی وەرگرتنی ڤیزا لەسەر هاوڵاتییانى عێراق هەڵبگرێت و لەمەودوا عێراقییەکان دەتوانن بێ ڤیزا و ڕێگەدانى ئەمنیی بچنە خاکى سوریاوە.
ڕۆژنامەى ئەلوەتەنى سوریی بڵاویکردوەتەوە کە بڕیارى هەڵگرتنی مەرجی ڤیزا لەسەر هاوڵاتییانى عێراق لە ڕۆژى چوارشەممە (دوێنێ)ـوە چووەتە بوارى جێبەجێکردنەوە و ئەم بڕیارەش تەواوى دەروازە وشکانیی و ئاسمانییەکان دەگرێتەوە.
ئاماژە بەوەشکراوە، هاوڵاتیی عێراقى لەگەڵ گەیشتنى بۆ سنورەکانى سوریا جا لە دەروازە وشکانییەکان بێت یان فڕۆکەخانە ڕەزامەندى چونە نێو سوریا وەردەگرێت و پێویست بە داواى وەرگرتنی ڤیزاى پێشوەخت ناکات.
لە بەرامبەردا هاوڵاتی سوریی پێویستە بۆ هاتنە نێو خاکى عێراق مۆڵەتى گەشتى ئەلیکترۆنى وەربگرێت پێش ئەوەى لەڕێى خاڵە سنورییەکانەوە بێنە خاکى عێراقەوە.
