سەرۆکی یەکێتی نیشتیمانی کوردستان بەبۆنەی یادی شەهیدی یەکێتییەوە پەیامێکی بڵاوکردەوە و دەڵێت”ئەمڕۆ بە خۆشەویستی و وەفاداریی هەمیشەییمانەوە یادی شەهیدانی یەكێتی دەكەینەوە و دروود و سڵاو بۆ دڵسۆزی و خۆڕاگری كەسوكارە سەربەرزەكانیان دەنێرین”.
بافڵ تاڵەبانی بەبۆنەی رۆژی شەهیدی یەکێتی لە پەیامەکەیدا دەڵێت، یەكێتیی نیشتمانیی كوردستان هەمیشە سیمبولی خەبات و تێكۆشان بووە لەپێناو كوردستان و هەرواش دەمێنێتەوە، مێژووی یەکێتی هێندە زێڕین و درەوشاوەیە، كە هەموو رۆژەكانی ساڵ رۆژی تێكۆشان، فیداكاری و شەهیدبەخشینە لەپێناو خاكەكەمان و هەڵدانەوەی هەر لاپەڕەیەكی رابردوو، سەروەرییەكی حزبی شەهیدانی تێدا تۆماركراوە.
ئاماژە بەوەشدەدات، خوێنی شەهیدانیان لەیادنەكردووە و لەگەڵ هەر ناوهێنانێكییاندا دەست لەسەر دڵ دادەنێن، بەئەمەكی و خۆڕاگریی كەسوكاری شەهیدانیان لەبیرنەكردووە و خۆیان بە قەرزاری هەموو ئەو رۆژانە دەزانن كە سەرباری رژانی خوێنی رۆڵەكانیان، یەكێتییان لە دڵیاندا هەڵگرت، ئەوان خاوەنی راستەقینەی یەكێتین و ئێمەش خزمەتكاریان.
لە کۆتایشدا دەڵێت”سڵاو لە گیانی پاكی شەهیدان و سەرفرازی بۆ كەسوكارە سەربەرزەكەیان”.
