بەگوێرەی بۆرسەی جیهانی بازاڕی نەوت یەک بەرمیل نەوتی خاوی برێنت بە ٧٧ دۆلار و ٤٦ سەنت مامەڵەی پێوەدەکرێت و بەراورد بە دوێنێ نرخەکەی دوو دۆلار و ١٤ سەنت دابەزیووە.
ئەمڕۆ هەینی، نرخی یەک بەرمیل نەوتی خاوی ئەمریکی (تێکساس) بە ٧٢ دۆلار و ٩٢ سەنتە و بەراورد بە دوێنێ پێنجشەممە نرخەکەی لە دابەزیندایە.
لە مانگی ڕابردوودا سعودیە ڕایگەیاند، لەگەڵ ڕوسیا تا کۆتایی مانگی کانوونی دووەمی داهاتوو بەردەوام دەبن لە کەمکردنەوەی خۆبەخشانەی بەرهەمهێنانی نەوت و بەپێی بڕیارەکەش سعودییە ڕۆژانە تەنها نۆ ملیۆن بەرمیل نەوت بەرهەمدەهێنێت.
لەو بارەیەوە، ڕێکخراوی ئۆپیک کە لەکۆمەڵەی وڵاتانی بەرهەمهێنەری نەوت پێکدێت ڕایانگەیاند، کەمکردنەوەی بەرهەمهێنانی نەوت لەلایەن سعودییە و ڕوسیاوە دەبێتە هۆی کەمبوونەوەی دابینکردنی ڕێژەی پێویستی نەوت لە جیهاندا تا کۆتایی ئەمساڵ.
لایخۆشیەوە، عەلی مەشکور، ئەندامی لیژنەی نەوت و غاز لە پەرلەمانی عێراق ڕایگەیاند، ناکۆکییەکانی نێوان حەماس و ئیسرائیل کاریگەری لەسەر نرخی نەوت و بازاڕەکانی ئەو وزەیە دروستکردووە و هەر بەرزبوونەوەیەک لە نرخی نەوتدا کورتهێنانی بودجەی عێراق کەمدەکاتەوە.
ئەمەش لە کاتێكدایە، وەزارەتی نەوتی عێراق ڕایگەیاند، زیادکردنی بەرهەمهێنان و هەناردەکردنی نەوتی عێراق کاریگەری لەسەر بڕیارەکەی ئۆپیک پڵەس ناکات و بۆ سەقامگیری بازاڕی نەوت و جیهان پابەندی بڕیارەکان دەبن.
