ئەمڕۆ ئەمینداری گشتی یەكگرتووی ئیسلامیی كوردستان سەبارەت بە داواکاری مامۆستایان ڕایگەیاند، ناكرێت دەسەڵات هێندە بێ باك بێت لە ئاست وەستانی خوێندن و جێبەجێنەكردنی داواكاری مامۆستایان، ئێمە پشتیوانی لە خواست و داوای ڕەوای مامۆستایان دەكەین.
ئەمڕۆ شەممە، سەڵاحەدین محەممەد بەهائەدین، ئەمینداری گشتی یەكگرتووی ئیسلامیی كوردستان ڕایگەیاند، جەوهەری ژیانی كۆمەڵگە قوتابی و گەنجە، ناكرێت دەسەڵات هێندە بێ باك بێت لە ئاست وەستانی خوێندن و جێبەجێنەكردنی داواكاری مامۆستایان، ئێمە پشتیوانی لە خواست و داوای ڕەوای مامۆستایان دەكەین، پێویستە حكومەت و بەرپرسان سەرجەم داواكارییەكانی مامۆستایان جێبەجێ بكەن بۆ ئەوەی ئەوانیش بتوانن درێژە بە ئەركی مامۆستایەتی بدەن و قوتابیان بگەڕێننەوە هۆڵەكانی خوێندن.
هاوکات سەبارەت بە دۆخی غەزە ئەمینداری گشتی یەكگرتوو ڕایگەیاند، بەداخەوە كاولكاری و داگیركاری ڕژێمی ئیسرائیل بۆ سەر كەرتی غەززە و بەتایبەت هاوڵاتیان بەردەوامە، لە هەمان كاتیشدا ئەوەی لە غەززە ڕوو دەدات نمونەیەكی جوانە لە خۆڕاگری و ڕوبەڕوبوونەوە كە لە چلەكانەوە درێژەی هەیە و خۆڕاگری غەزە وێنەی نەبووە مەگەر سەردەمی ئەسحابەكان ڕوبەڕوبوونەوە و هێز و توانای لەو ڕادەیە هەبووبێت.
