بڕیارە لە سەرەتای ساڵی داهاتوودا وەزارەتی سەرچاوەکانی ئاوی عێراق بە هۆی کەم ئاوییەوە نزیکەی سێ هەزار حەوزی ماسی تێکبدات کە بە شێوەیەکی نایاسایی لەسەر هەردوو ڕووباری دیجلە و فورات دروستکراون.
زۆزان عەلی، جێگری سەرۆکی لیژنەی کشتوکاڵ و ئاو و هۆڕەکان لە ئەنجومەنی نوێنەران بە ڕۆژنامەی سەباحی ڕاگەیاند، هەردوو وەزارەتی سەرچاوەکانی ئاو و کشتوکاڵ ڕێککەوتوون لەسەر تێکدانی ئەو حەوزانەی بە زێدەڕەوی بۆ بەخێوکردنی ماسی دروستکراون.
هۆکاری بڕیارەکەشی بۆ ئەو کەمئاوییە گەڕاندەوە کە بە هۆی گۆڕانکاریی کەشوهەوا و بەرزبوونەوەی پلەی گەرما ڕووی لە عێراق کردووە.
ڕاشیگەیاند، تێکدانی حەوزە نایاساییەکان دەبێتە هۆی بەکارهێنانی ئاو بە شێوەیەکی باشتر و دابەشکردنی دادگەرانە لە نێو پارێزگاکاندا.
پەرلەمانتارەکە ئەوەشی خستەڕوو کە نزیکەی دوو هەزار حەوزی مۆڵەتپێدراو هەیە و ژمارەی نایاساییەکانیش دەگاتە سێ هەزار کە دوو هەزاریان لەسەر ڕووباری دیجلە و ئەوەی دیکەشی لەسەر ڕووباری فورات دروست کراون.
زۆزان عەلی داواشی لە خاوەنی حەوزەکان کرد سیستمی نوێ بۆ بەخێوکردنی ماسی بەکاربهێنن بۆ ئەوەی ڕی لە بەفیڕۆدانی ئاو بگیرێت.
