وەزارەتی دەرەوەی عێراق کردنەوەی سیستەمی دەرکردنی پاسپۆرتی ئەلیکترۆنی لە باڵەخانەی باڵیۆزخانەی ئەنقەرەی پایتەختی تورکیا ڕاگەیاند.
بەپێی زانیارییەکانی ڕاگەیەندراوی وەزارەتی دەرەوەی عێراق ” ئەمڕۆ ماجید جەماوی، باڵیۆزی کۆماری عێراق لە ئەنقەرە، سیستەمی پێدانی پاسپۆرتی ئەلیکترۆنی لە باڵەخانەی باڵیۆزخانەی پایتەختی تورکیا کردەوە، هەنگاو و میکانیزمەکانی دەرکردنی بە هەموو وردەکارییەکانیان پەیڕەو کرد، هەروەها سەرپەرشتی دەرکردنی یەکەم کۆپی پاسپۆرتی ئەلیکترۆنی لە تورکیا کرد”.
ماجید جەماوی وتیشی، “پاسپۆرتی ئەلیکترۆنی یارمەتی کەمکردنەوەی زیاتر ٪٨٤ ڕێکارە ڕۆتینی و کارگێڕییە کاغەزییەکان دەدات، هەروەها لە ماوەیەکی کورتدا پاسپۆرتەکە دەدرێتە هاووڵاتیان”.
بەگوێرەی ڕاگەیەندراوەکە، “باڵیۆزخانە و کونسوڵخانە گشتییەکان لە ئەستەنبوڵ و غازی عەنتاب بەردەوامن لە گرتنەبەری ڕێوشوێنی پێویست بۆ ئاسانکردنی ڕێکارەکان بۆ هاووڵاتیانی نیشتەجێی تورکیا”.
