ئەنجومەنی ستافی ناڕازی مامۆستایان و فەرمانبەرانی زانکۆی سلێمانی ڕایانگەیاند، “بەردەوام دەبین لە بایکۆت تا داواکارییەکانمان جێبەجێدەکرێت”.
مامۆستایان و فەرمانبەرانی ناڕازی زانکۆی سلێمانی به‌یانی ئه‌مڕۆ پێنجشه‌ممه له‌به‌رده‌م كامپی نوێی زانكۆكه گردبوونه‌وه و لە کۆنگرەیەکی ڕۆژنامەوانیدا ڕایانگەیاند، “بە لەبەرچاوگرتنی دۆخی دارایی مامۆستایان، فەرمانبەران و خوێندکارانی زانکۆی سلێمانی بەردەوام دەبین لە بایکۆت و ناگەڕێینەوە هۆڵەکانی خوێندن، تا دڵنیا دەبین لە دەستەبەرکردنی کەشێکی گونجاویی خوێندن لە دابینکردنی شایستە داراییەکان و پێداویستییەکانی فێرکردن”.
ئاماژەی بەوەکرد، ” وەک مامۆستا، فەرمانبەران و خوێندکارانی زانکۆ لەگەڵ چین و توێژەکانی دیکە هەماهەنگ دەبین لە داڕشتنی نەخشە ڕێگایەک بۆ چارەسەرکردنی کێشەکان و قەیرانەکانی هەرێمی کوردستان، هاوکات دەرەنجامە نەرێنییەکانی بایکۆت دەخەینە ئەستۆی لایەنە پەیوەندیدارەکان”.
سەبارەت بە ڕاگەیاندنی دەستپێکردنەوەی دەوام لەلایەن ئەنجومەنی زانکۆ ڕایانگەیاند، ” لە کاتێکدا خوێندن لە زانکۆی سلێمانی ٧ هەفتە دواکەتووە، هاوکات ڕاگەیاندنی دەستپێکردنەوەی دەوام لە کاتێکدایە کە چارەسەرکردنی کێشەکانی تێدا لەبەرچاو نەگیراوە، ڕەچاوی ڕەوشی مامۆستا و خوێندکاران نەکراوە لە جێبەجێکردنی داواکارییەکانی مامۆستا، فەرمانبەران و خوێندکاران، تا بتوانن بە دەروونێکی ئارامەوە دەستبکەنەوە بە پڕۆسەی خوێندن”.
