هێرشی ئاسمانیی ئیسرائیل بۆ سەر چەند پێگەیەکی سووریا کوژران و برینداربوونی 15 سەربازی لێکەوتەوە.
ئاژانسی هەواڵی فەرمیی سووریا لە زاری سەرچاوەیەکی سەربازییەوە بڵاویکردەوە، کاتژمێر 01:45 خولەکی ئەمڕۆ، ئیسرائیل لە بەرزاییەکانی جۆلانەوە هێرشی ئاسمانیی کردە سەر چەند خاڵێکی سەربازیی لە دەوروبەری دەرعا.
ڕوونیشیکردەوە کە لە ئاکامی هێرشەکەدا هەشت سەرباز کوژران و حەوتی دیکەش بریندار بوون.
سەرچاوەکە ڕاشیگەیاند، جگە لە زیانە گیانییەکان، هێرشەکە زیانی ماددیشی لێکەوتووەتەوە.
لە دوای هێرشەکانی 7ی ئەم مانگەی حەماس بۆ سەر ئیسرائیل، ڕۆژهەڵاتی ناوەڕاست بە دۆخێکی هەستیاردا دەڕوات و گروپەکانی بەرەی ئێران هەڕەشەی فراوانکردنی جەنگ لە ئیسرائیل دەکەن.
