مامۆستایانی ناڕازی لە راگەیەندراوێکدا هۆشداری دەدەنە حکومەت و دەڵێت:”بڵاوکردنەوەی هەواڵی ساختە ساردمان ناکاتەوە و هەڕەشە راستەوخۆو ناراستەوخۆکان نامانترسێنێت. بۆیە بەهیچ شێوەیەک بایکۆت ناشکێنین”.
مامۆستایان وفەرمانبەرانی ناڕازیی لە راگەیەندراوێکدا دەڵێن:”داواکارین مامۆستایان و فەرمانبەران بوێرانە بەردەوام بن لەبایکۆت و گوێ نەدەنە هیچ هەڕەشەیەک و وەڵامی ڤۆیس ونامەی گروپ چاتەکانی فەرمانگە و قوتابخانەکان نەدەنەوە و بەردەوام بن لە بایکۆت”.
پێتان ڕادەگەیەنین کە سور وپێداگرین لەسەر ئەم خاڵانەی خوارەوە:
• بڵاوکردنەوەی هەواڵی ساختە ساردمان ناکاتەوە و هەڕەشە راستەوخۆو ناراستەوخۆکان نامانترسێنێت. بۆیە بەهیچ شێوەیەک بایکۆت ناشکێنین.
• وەک سەرەتای ناڕەزایەتییەکان، داواکارین خاوەن پۆست و بەڕێوەبەرەکان کورسیەکانیان بکەنە قوربانیی لەپێناو بەرژەوەندی گشتی و سەندنەوەی مافی هەموواندا.
• داواکارین مامۆستایان و فەرمانبەران بوێرانە بەردەوام بن لەبایکۆت و گوێ نەدەنە هیچ هەڕەشەیەک و وەڵامی ڤۆیس ونامەی گروپ چاتەکانی فەرمانگە و قوتابخانەکان نەدەنەوە و بەردەوام بن لە بایکۆت.
• لەئێستادا پلانی ئەنجامدانی خۆپیشاندانمان نیە جگە لە پاڵپشتی گردبوونەوەی وانەبێژان.
• دڵنیایی دەدەین کە لەهیچ لایەنێک قبوڵ ناکەین، بەتایبەت ئۆپۆزسیۆنی ساختە و کەسانی گومانلێکراو، سواری شەپۆلی ناڕەزایی مامۆستایان وفەرمانبەرانی ناڕازیی ببن.
