شەڕی نێوان فەلەستین و ئیسرائیل پێی نایە 18هەمین ڕۆژەوە و تا ئێستا نزیكەی 30 هەزار كەس لە هەردوو لایەنی جەنگەكە كوژراو و بریندار و دیل و بێ سەروشوێنن و ڕۆژانەش لە هەڵكشانە و هۆشداریش لە نەمانی پێداویستی پزیشكی دەدرێت.
ئەمڕۆ دوو شەممە 23ی تشرینی یەکەمی 2023، وتەبێژی تەندروستی غەززە ڕایگەیاندووە، لە سەرەتای شەڕەکەوە تاکو ئێستا زیاتر لە 5 هەزار کەس کوژراون، 12 نەخۆشخانە و 32 سەنتەری پزیشکی لە هەوڵی چارەسەرکردنی بریندارەکاندان.
ئاماژەی بەوەکردووە، بەهۆی نەبوونی دەرمان و پێداویستی پزیشکییەوە بریندارەکان بەبێ بەنج چارەسەر دەکرێن و وتیشی، “بەهۆی نەبوونی هاوکاری و کەرەستەی پێویستەوە زیاتر لە 7 هەزار بریندار مەترسی مردنیان لەسەرە”.
ڕوونیشی كردۆتەوە، 5087 کەس کوژراون و 15 هەزار و 273 کەسیش بریندار بوون، 1500 کەس بێسەروشوێنن، کە 400یان ژن و 600یان منداڵن.
لای خۆشیەوە، حكومەتی تەل ئەبیب ڕایگەیاندووە، تاوەكو ئێستا 1500 ئیسرائیلی بەهۆی بۆردومانەكانی حەمماسەوە كوژراون، كە 307 كوژراویان سەربازی ئیسرائیلی بوون.
ڕاشیگەیاندووە، ژمارەی بریندارەكان زیاتر لە 5 هەزار كەس و هاوكات 210 سەربازی ئیسرائیلی بە دیلی كەوتوونەتە دەستی هێزەكانی حەمماس.
