ئەمڕۆ پێنجشەممە، کۆمپانیای نەستەلە بەشێوەیەکی کاتی داخستنی یەکێکە لە کارگەکانی بەرهەمهێنانی کۆمپانیاکەی لە ئیسرائیل ڕاگەیاند، ئەمەش یەکەم کۆمپانیای بەرهەمهێنانی کەرەستە بەکاربەرەکانە بڕیاری راگرتنی کارەکانی داوە بەهۆی بەردەوامی گرژی و ناکۆکییەکانی نیوان ئیسرائل و بزوتنەوەی حەماسی فەلەستینییەوە.
چەندین کۆمپانیای جیهانی بەشێوەیەکی کاتی کارەکانیان لە ئیسرائیل ڕاگرتووە و داوایان لە کارمەندەکانیان کردووە لەماڵەوە کارەکانیان بەڕێبکەن ئەوەش بەهۆی هێرشەکانی بزوتنەوەی حەماسی فەلەستینی بۆ سەر ئیسرائیل و وەڵامدانەوەی ئەو هێرشانە لەلایەن ئیسرائیلەوە بۆسەر کەردتی غەززە و دروستبوونی جەنگ لەنێوانیاندا.
ئاژانسی هەواڵی ڕۆیتەرز ئاماژەی بەوەکردووە، لە پەیوەندییەکی تەلەفۆنیدا لەگەڵ ڕۆژنامەنووساندا مارک شنایدەر سەرۆکی جێبەجێکاری کۆمپانیای نەستەلە ڕایگەیاند، ئێمە سەرنجمان لەسەر سەلامەتی گیانی کڕیار و کارمرندەکانمانە، وتیشی هیچ لێدوانێکم لەبارەی گەشەپێدانی کارەکانمان نییە و هەموو ڕێوشوێنێکی پێویستمان گرتووەتەبەر.
کۆمپانیاکانی دیکەی کاڵای پاکێجکراوی فرەنەتەوەیی تا ئێستا بێدەنگ ماونەتەوە سەبارەت بە ناکۆکییەکە، هەرچەندە کۆمپانیاکانی فرۆشتن و چاودێری تەندروستی و نەوت بەخێرای هەڵوێستی خۆیان ئاشکرا کرد.
ئەو کۆمپانیا نێودەوڵەتیانەی لە ئیسرائیل کارەکانیان راگرتووە و داوایان لەکارمەندەکانیان کردووە لەماڵەوە کارەکانی کۆمپانیا جێبەجێ بکەن بەمشێوەیەن:
-کۆمپانیا گەشتیارییەکان لە بواری فڕۆکەوانیدا، جەند کۆمپانیایەکی ئەمریکی، ئاسیایی و ئەوروپی گەشتە ڕاستەوخۆکانیان بۆ تەلئەبیب ڕاگرتووە.
-کۆمپانیاکانی بواری نەوت، کۆمپانیای چێڤرۆن کە دووەمین گەورەترین کۆمپانیای نەوت و گازی ئەمریکایە کێڵگەیەکی تایبەت بە گازی سروشتی لە کەناراوەکانی باکوری ئیسرائیل داخست.
-بانکەکان، بانکی جەی پی جی مۆرگان، گۆڵدمان ساکس و مۆرگان ستانلی داوایان لە کارمەندەکانیان کردووە لەماڵەوە کا بکەن.
-تەکنەلۆجیا، ئین ڤیدیا، گەورەترین کۆمپانیای دروستکردنی چیپی زیرەکی دەستکرد و کۆمپیوتەرە لە جیهاندا کۆڕبەندێکی خۆی لە تەلئەبیب هەڵوەشاندەوە
-پیشەسازی دەرمان، کۆمپانیای ئیلی لیلی ڕایگەیاند بەچڕی جاودێری دۆخەکە دەکەین لە ئیسرائیل و هەوڵی پاراستنی گیانی کارمەندەکانمان دەدەین و هەموو هەنگاوێک لەوپێناوەدا دەنێین.
