وەزارەتی تەندروستی فەڵەستین بڵاویکردەوە، ژمارەی ئەو کەسانەی لە دوای 7ی ئەم مانگەوە لە کەرتی غەززە بوونەتە قوربانی 16 هەزاری تێپەڕاند.
ئەمڕۆ چوارشەممە، وەزارەتی تەندروستی فەڵەستین ڕایگەیاند، تا ئێستا سێ هەزار و 300 کەس لە کەرتی غەززە گیانیان لەدەستداوە و زیاتر لە 13 هەزاری دیکەش بریندار بوون
ئەوەشی خستەڕوو کە دەرمان و پێداویستی لە کەرتی غەززە زۆر کەمبووەتەوە و بڕینی ئاو و داڕمانی ئاوەڕۆکانیش مەترسی بڵاوبوونەوەی نەخۆشییان زیاتر کردووە.
ڕۆژی 7ی ئەم مانگە بزووتنەوەی حەماس لە کەرتی غەززەوە هێرشێکی بەرفراوانی کردە سەر ناوچە سنوورییەکانی ئیسرائیل و بەهۆیەوە 1400 ئیسرائیلی کوژران.
لەو ڕۆژەشەوە ئیسرائیل هێرشی ئاسمانیی چڕی بۆ سەر غەززە دەستپێکردووە و جەخت دەکاتەوە لەوەی تا لەناوبردنی حەماس ناوەستێت.
ئەمڕۆش جۆ بایدن سەرۆکی ئەمریکا گەیشتە تەلئەبیب و پشتیوانی وڵاتەکەی بۆ جەنگی ئیسرائیل بەرامبەر بە حەماس دووپاتکردەوە.
بایدن ڕایگەیاند، ئیسرائیل هەر شتێکی پێویست بێت بۆی دابین دەکەین.
