بەڕێوەبەرایەتی نەوت و کانزاکانی سلێمانی ڕایگەیاند، پرۆسەی دابەشکردنی نەوت بەسەر ماڵان بەردەوامە و لە ئایندەیەکی نزیکدا شاری سلێمانی و دەوروبەری دەگرێتەوە.
بەڕێوەبەرایەتی نەوت و کانزاکانی سلێمانی ڕاگەیەندراوێکی بڵاوکردەوە، ” وەزارەتی سامانە سروشتییەکان بڕی سەد و پێنج ملیۆن لیتر نەوتی سپی بۆ پارێزگاکانی سلێمانی، هەڵەبجە و ئیدارە سەربەخۆکانی گەرمیان و ڕاپەڕین دابینکردووە، لە بەرواری ٩ ی تشرینی یەکەم دەست بەدابەشکردنی کرا”.
ئاماژەی بەوەکرد، ” لە سنووری پێنجوێن، ناحیەکانی سەیدسادق، ناحیەکانی هەردوو ئیدارەی ڕاپەڕین و گەرمیان نەوت بەسەر ٢٨ هەزار و نۆ سەد و چل و پێنج خێزان دابەشکراوە، لە ئایندەیەکی نزیکدا شاری سلێمانی و دەوروبەری دەگرێتەوە”.
سەبارەت بە دابینکردنی نەوتی سپی بۆ سنووری پارێزگای سلێمانی ئەوەشی خستەڕوو، ” پێش هاتنی وەرزی سەرما گفوتگۆ لەگەڵ وەزیری نەوتی عێراق کراوە، پێویست ناکات هیچ لایەن و فراکسیۆنێکی پەرلەمان موزایەدە لەسەر دابینکردنی نەوتی هاووڵاتیان لە سنووری پارێزگای سلێمانی بکات”.
