لیژنەی دارایی پەرلەمانی عێراق ڕایدەگەیەنێت، پێویستە ڕێوشوێنی پێویست بگیرێتەبەر بۆ کۆنتڕۆڵکردنی نرخی دۆلار و بخرێتە سەر ڕێگا ڕاستەکە.
فەرمانگەی ڕاگەیاندنی پەرلەمانی عێراق لە ڕاگەیەندراوێکدا کە ئەمڕۆ بڵاویکردەوە تێیدا هاتوە، لیژنەی دارایی پەرلەمانی عێراق بە ئامانجی تاوتوێکردنی ڕاپۆرتی لیژنە لاوەکییەکان لەبارەی ڕێکارەکانی بانکی ناوەندی و بانکە ناحکومییەکان و سیاسەتی نەقدی لە وڵاتدا کۆبووەوە و داوای هەرچی زوو جێگیرکردنی نرخی دۆلار دەکات.
عەتوان عەتوانی سەرۆکی لیژنەکە لە کۆبونەوەکەدا ئاماژەی بە سەرجەم ڕێکارەکانی پەیوەست بە ئابوری و باج کردوە لەگەڵ دۆزینەوەی ڕێگایەکی کرداری بۆ بون بە چاودێری بەسەر دەزگاکانەوە بە مەبەستی پارێزگاریکردن لە سەقامگیری دارایی و بانکی و سیاسەتی نەقدی.
لیژنەی دارایی گفتوگۆی هۆکارەکانی بەرزبونەوەی دۆلاری بەرامبەری دیناری عێراقی و چەند ڕێکارێک بۆ کۆنتڕۆڵکردنی نرخی دۆلار و بخرێتە سەر ڕێگا ڕاستەکە کرد.
لیژنەی دارایی هەڵسەنگاندنی کرد بۆ سیاسەتی بانکی ناوەندی و بانکە ناحکومییەکان و ڕۆڵی بانک لە بابەتە داراییەکان و ئاڵەنگارییەکانی سیاسەتی نەقدی و چۆنیەتی کۆنتڕۆڵکردنی بازاڕەکان.
نرخی دۆلار ڕۆژانە ناجێگیرە، بەجۆرێک لە دوکەڵێک دەچێت لەهەرکاتێکدابێت ئاگرێکی گەورەی لێ بکەوێتەوە، هۆکارەکەش بەپێی بۆچوونی شارەزایان و چاودێرانی دارایی، بوونی ئەو ژمارە زۆرەی قاچاخانی دۆلارە لە عێراق، کە وەک مافیایان لێهاتووە و بازاڕی دۆلاریان لە عێراق کۆنتڕۆڵ کردووە.
