دواین ئاماری كوژراوانی ئیسڕائیل و فەلەستین ڕاگەیەنرا

شەڕی نیوان بزووتنەوەی حەمماسی فەلەستینی و ئیسڕائیل چوووە سێیەم ڕۆژەوە و بەپێی ئامارە فەرمییەكان تا ئێستا نزیكەی 1300 كەس كوژراون و زیاتر لە 5 هەزار كەس بریندارن و بەرەی بەرگری فەلەستینی هەڵدانی ژمارەیەك مووشەكی دیكەیان بەرەو ئیسڕائیل ڕاگەیاند و لە بەرامبەریشدا ئیسڕائیل ئاوی خواردنەوەی غەززەی بڕی.

وەزارەتی تەندروستی لە غەززە لە بەیاننامەیەكدا ئاماژەی بەوەكردووە، ژمارەی كوژراوانی هێرشەكانی ئیسڕائیل گەیشتۆتە 493 كەس، كە 91 منداڵ و 61 ژنیان تێدایە و هەروەها 2 هەزار و 751 كەس بریندارن، كە 244 منداڵ و 151 ژنیان تێدایە.

لای خۆشیەوە، وەزارەتی تەندروستی ئیسڕائل ژمارەی قوربانیانی هێرشەكانی حەمماسی بڵاوكردەوە و ڕایگەیاندووە، 800 كەس كوژراون و 2 هەزار و 506 كەسیش بریندارن.

هاوكات، گرووپی بەرگری فەلەستینی لە بەیاننامەیەكدا ئاماژەی بەوەكردووە، كە ژمارەیەك مووشەكی دیكەیان بەرەو ئیسڕائیل هەڵداوە.

ئەمینداری گشتی بزووتنەوەی جیهادی ئیسلامی لە بەیاننامەیەكدا دەڵێت: “گەلە ئازاكەمان توانیویانە دوژمن گەمارۆ بدەن لە پێگە سەربازییەكان و كۆمەڵگە نیشتەجێكان”.

ڕاشیگەیاندووە، تا ئێستتا زیاتر لە 30 دیلی دوژمنمان دەستگیر كردووە و لای خۆمان پارێزراون، بەڵام بەهۆی بۆردومانی ئیسڕائیلەوە بۆ سەر غەززە 4 دیل كوژراون.

لە بەرامبەریشدا وەزیری وزەی ئیسڕائل ڕایگەیاندووە، ئاوی خواردنەوەمان لە غەززە بڕیوە.