ئەحمەد گەرمیانی، سەرۆکی یەکێتی مامۆستایان رایگەیاند، بایکۆت چارەسەر نییە و دەبێت ئێمە قوربانی بدەین بۆ بەردەوام بوون لە بەرەوپێشچوونی کەرتی پەروەردە
لە کۆنگرەیەکی ڕۆژنامەنووسیدا ئەحمەد گەرمیانی ڕایگەیاند، مامۆستایان مافی خۆیانە داوای مووچەکانیان بکەن، بەڵام بایکۆت چارەسەر نییە و لە پێشتریشدا ئەوەمان دیوە کە بایکۆت چ زیانێکی لە کەرتی پەروەردە و خوێندن داوە، هەروەها دەبێت مامۆستایان لە خۆبردوانە بچنەوە ناوەندەکانی خوێندن،
لەبەشێکی تری وتەکانیدا ئاماژە بەوە دەدات، ناکرێت قوتابیان و خوێندکاران نەچنەوە ناوەندەکانی خوێندن و لەماڵەوە بن، لە کاتێکدا بەشێک لە منداڵانی ئەو کەسانەی بایکۆتیان کردووە لە ناوەندە نا حکومییەکان دەوام بکەن و بخوێنن،
ئەحمەد گەرمیانی باسی لەوەشکرد، عێراق پێنەدانی مووچەکانی هەرێمی وەک فشاری سیاسی بەکار هێناوە دەنا هەندێک بابەتی سیاسی هیچ پەیوەندی بە مووچەوە نییە و تەواو جیاوازە، بەڵام دەزانین ئەم پرسە سیاسییە و چارەسەرەکەشی دەبێت بە پێکەوە دانیشتنی حکومەتی هەرێم و عێراق بێت،
ئەحمەد گەرمیانی وتیشی” دەبێت مامۆستایان قوربانی بدەن وەک چۆن پێشتر قوربانییان داوە و بچنەوە ناوەندەکانی خوێندن”.
لە ناوەڕاستی مانگی ١٠ نزیک دەبینەوە و تا ئێستا بەشێک لە ناوەندەکانی خوێندن لە هەرێم بایکۆتی دەوامیان کردووە و ناچنەوە ناوەندەکانی خوێندن بەهۆی دابەشنەکردنی مەەچەی مانگەکانی ٨ و ٩ ، مەرجی سەرەکی مامۆستایان دابەشکردنی دوو مووچەیە.
