هاوسەرۆکی شارەوانی مەخموور: تورکیا دەست لە ماڵی خوداش ناپارێزێت

هاوسەرۆکی شارەوانی مەخموور ڕایگەیاند، ئەو شوێنەی کە فڕۆکە بێفڕۆکەوانەکەی تورکیا بۆردومانی کردووە مزگەوتە و بە هۆیەوە پێنج کەس برینداربوون.
بەدران پیران هاوسەرۆکی شارەوانی مەخموور لە لێدوانێکدا بۆ دەنگی ئەمریکا، ڕایگەیاند، هێرشەکەی دوێنێ شەو “لە ڕێگەی فڕۆکەی بێفڕۆکەوانەوە ئەنجامدراوە و یەک جار لە کەمپەکەی داوە، لە ئەنجامی هێرشەکەشدا 5 کەسی سڤیل برینداربوون.”
ڕاشیگەیاند، “هێرشەکە لە ناوچەی دوو بووە و ڕاستەوخۆ لە مزگەوتی گوندەکەی داوە، بەو هۆیەشەوە نزیکەی 40 خانووی هاووڵاتییان زیانی بەرکەوتووە.”
شەوی ڕابردوو دژە تیرۆری کوردستان بڵاویکردەوە کە بۆردومانەکە کۆبوونەوەیەکی پەکەکەی کردووەتە ئامانج و بە هۆیەوە “سێ چەکداری پەکەکە کوژراون”.
بەڵام هاوسەرۆکی شارەوانی مەخموور ڕەتی دەکاتەوە هێرشەکەی شەوی شەممە بۆسەر هیچ بنکەو بارەگایەکی پەکەکە بووبێت و وتی، “هێرشەکە بۆسەر خەڵکی سڤیل و ماڵی خودا بووە، تورکیا دەست لە ماڵی خوداش ناپارێزێت، نەک هاووڵاتییانی کورد.”