خۆپیشاندانی مامۆستایان لە بەردەم پەروەردەی هەڵەبجە و زانكۆی سلێمانی دەستپێدەكات و مامۆستایانی ناڕازی بانگەوازێك بڵاودەكاتەوە.
دەستەی داكۆكی لە مافی مامۆستایان و فەرمانبەران لە بانگەوازێكدا ئاماژە بەوەدەكات، سبەینێ یەك شەممە 8ی 10ی 2023 لە بەردەم بەڕێوەبەرایەتی گشتی پەروەردەی هەڵەبجە لە كاتژمێر 10ی سەرلەبەیانی خۆپیشاندان دەستپێدەكەنەوە.
ڕاشیگەیاندووە، مامۆستایان و فەرمانبەرانی بەهەڵوێست ئاگادار دەكەینەوە، بە مەبەستی ناڕەزایی و داكۆكی لە داواكاریی مامۆستایانی وانەبێژ و دووپاتكردنەوەی بەردەوامی بایكۆت خۆپیشاندان ئەنجام دەدەن.
لای خۆشیانەوە، مامۆستایانی زانكۆی سلێمانی ڕایانگەیاندووە، سبەینێ لە بەردەم زانكۆی سلێمانی دەست بە خۆپیشاندان و ناڕەزایی دەكەن سەبارەت بە دواكەوتنی مووچە.
ئەمە لەكاتێكدایە، كە ماوەی سێ هەفتەیە لە سنووری سلێمانی و هەڵەبجە و گەرمیان و ڕاپەڕین و كۆیە، مامۆستایان و بەشێكی زۆری فەرمانبەران بایكۆتیان كردووە و داوای مووچەی مانگەكانی 8 و 9 دەكەن و داوا دەكەن مووچەكانیان بخرێتە سەر بەغدا.
