ماوەی چەند ڕۆژێكە شەپۆلێكی باران بارینی مام ناوەند چەند ناوچەیەكی هەرێمی كوردستانی گرتۆتەوە و ئەمشەو كۆتایی دێت و تاوەكو هەفتەیەك كەشوهەوا سەقامگیر دەبێت.
سیروان ساڵح، شارەزای كەشناسی بۆ (خەڵك) ڕایگەیاند، لە ئێستادا هەور ئاسمانی ناوچەکەی داپۆشیوه، لە ناوچه شاخاوییەکانی باکووری هەولێر و دهۆک لە هەندێ شوێن تاوەباران و هەورەبروسکەیه، له نێوان بەغدا و بەعقوبەش تاوێکی بارانی کەم و هەورەبروسکە هەیە، ئەم بارودۆخە تا ئەمشەو بەردەوام دەبێت و دواتر کۆتایی دێت.
وتیشی، “ئەگەر هەیە لە ناوچه شاخاوییەکان سبەینێ هەوری ناوخۆیی دروست ببێت و چەند تاوێکی بارانی ناوخۆیی ببارێت لە ماوەیەکی کورتدا”.
لای خۆشیەوە، ئاراس جەبار، شارەزای كەشناسی بۆ (خەڵك) وتی، “کاریگەری ئەم نزمە پاڵەپەستۆیە لەسەر ناوچەکانمان تا کاتەکانی ئەمشەو بەردەوامی ئەبێت و لە کات و شوێنی جیا جیادا ئەگەری نمە باران و بەشێوەی ھەرەمەکی تاوە باران و بروسکەش چالاک ئەبێت بەتایبەت لەسەر ناوچەکانی پارێزگای دھۆک و ناوچە شاخاویەکانی پارێزگای ھەولێر دواتر کۆتای پێدێت”.
ئاشكراشی كرد، لەسبەی پێنج شەممەوە 5/10/2023 کەش جێگیر ئەبێت و تا نزیکەی 7 ڕۆژی داھاتوو بەجێگیری ئەمێنێتەوە لەگەڵ بەرزبوونەوەیەکی کەم لە پلەکانی گەرمی.
