بڕیارە سبەینێ لیژنەی دارایی لە ئەنجومەنی نوێنەرانی عێراق وەزیرانی پلاندانان و دارایی بانگھێشت بکات، بۆ لێکۆڵینەوە لە ھۆکارەکانی دواکەوتنی جێبەجێکردنی بودجە و دابینکردنی پارە بۆ پارێزگاکان.
ئیخڵاس دلێمی ئەندامی لیژنەی دارایی ئەنجومەنی نوێنەرانی عێراق رایگەیاند، ئەمڕۆ بانگھێشتی سەرجەم پارێزگارەکانیان کردووە و تا ئێستا پارێزگاکان ھیچ پارەیەکیان لە بودجەوە وەرنەگرتووە، چونکە پڕۆژەکان بە قۆناغی ئاڵۆزدا تێدەپەڕن و دەبێت بچنە وەزارەتی پلاندانان و پەسەند بکرێن و پاشان رەوانەی دەستەی ھەماھەنگی پارێزگاکان بکرێت.
دلێمی وتیشی، تا ئێستا بودجە جێبەجێنەکراوە ئەگەرچی لە مانگی حوزەیرانەوە دەنگی لەسەردرا، ھەردوو وەزارەتی پلاندانان و داراییش بەرپرسن لە پارەدارکردنی پڕۆژەکان.
ئیخڵاس دلیمی ئاماژەی بەوەشدا، سبەینێ لیژنەی دارایی بانگھێشتی وەزیری پلاندانان و وەزیری دارایی دەکات، بۆ زانینی ھۆکارەکانی دواکەوتنی جێبەجێکردنی بودجە و پارەدارکردنی پڕۆژەی پارێزگاکان.
لە مانگی حوزەیرانەوە دەنگ لەسەر یاسای بودجەی سێ ساڵی عێراق دراو، دەبوایە لەدوای پەسەندکردنی بکەوێتە بواری جێبەجێکردنەوە، و پارەدارکردنی پرۆژەکان دەست پێبکات، بەڵام تائێستا ئەو یاسایە بەتەواوەتی نەچۆتە بواری جێبەجێکردنەوە و بەشێکی زۆری پرۆژەکان پەکیان کەوتووە.
