لەسەر ڕێگای كەلار- دەربەندیخان، كە بە “ڕێگای مەرگ” ناسراوە نزیك گوندی عیسای بەهۆی ڕووداوێكی هاتووچۆوە سێ كەس برینداربوون.
هاتووچۆی گەرمیان لە ڕاگەیەنراوێكدا ئاماژەی بەوەكردووە، كەمێك پێش ئێستا لەسەر ڕێگای كەلار- دەربەندیخان بەهۆی ڕووداوێكی هاتووچۆوە لە نێوان (جێب لاریدۆ – نیسان پیكاب) سێ كەس برینداربوون، بریندارەكان شۆفێر و سەرنشینێكی نیسان پیكابەكەیە، لەگەڵ سەرنشینێكی ئۆتۆمبێلی جێب لاریدۆ.
ڕاشیگەیاندووە، هەردوو ئۆتۆمبێلەكە بەئاراستەی قەزای دەربەندیخان ڕۆیشتوون لەناو گوندی (عیسای) ڕووداوەكە ڕوویداوە، پاشان هەردوو ئۆتۆمبێلەكە وەرگەڕاون.
ئاشكراشی كردووە، بەمەبەستی زانینی هۆكاری ڕووداوەكە و چۆنیەتی ڕووداوەكە لێكۆڵینەوە لەلایەن تیمی هاتووچۆی گەرمیانەوە بەردەوامە، هەر سێ بریندارەكە گەیەنراونتە نەخۆشخانەی شەهید مەلا ئەحمەد كەلاری لەناحیەی باوەنوور.
