ڕۆژی سێشەممە، ڕێکخراوی گەشەپێدانی بازرگانی ئێران ئامادەیی حکوومەتی وڵاتەکەی بۆ هاوکاری لەگەڵ عێراق و بەشداریکردن لە گەشەپێدانی پیشەسازیی وڵاتەکەی تا ساڵی ٢٠٣٥ دەربڕی، پێشنیاری بەرزکردنەوەی قەبارەی ئاڵوگۆڕی بازرگانی نێوان هەردوو وڵاتی بۆ ٤٠ ملیار دۆلاری ساڵانە کرد.
لە میانی کۆنفرانسی بازرگانی هاوبەشی ئێران و عێراق لەلایەن سەرۆکی ڕێکخراوەکە، مەهدی ضیغمی پێشکەش کرا، ئێران ئامادەی خۆی نیشاندا بۆ دابینکردنی تەکنەلۆجیا بۆ عێراق و پەرەپێدانی پڕۆژەی پیشەسازی لە عێراق.
ناوبراو وتی، بە ناوی وەزارەتی پیشەسازی و حکومەتی ئێرانەوە پشتیوانی هەمەلایەنەی خۆمان بۆ گەشەپێدانی پیشەسازیی عێراق تا ساڵی ٢٠٣٥ ڕادەگەیەنین، قەبارەی پەیوەندییە بازرگانییەکانی نێوان ئێران و عێراق لە زیادبووندایە و ساڵانە دەتوانێت بگاتە ٣٠ یان ٤٠ ملیار دۆلار.
لە درێژەی قسەکانیدا ئاماژەی بەوەکرد، “لیژنەی بازرگانی هاوبەشی نێوان هەردوو وڵات لێکۆڵینەوە لە پەرەپێدانی پلانەکان و پەرەپێدانی ژێرخانی ئابووری، ڕێگاکانی پەرەپێدانی بازرگانی نێوان ئێران و عێراق دەکات”.
هەروەها ئەوەی خستەڕوو، “لیژنەکە لێکۆڵینەوەی کردووە بۆ هەڵوەشاندنەوەی سنووردارکردنی بازرگانی و تایبەتمەندییەکانی نێوان هەردوو وڵات، لەگەڵ پرسە لۆجستی و بازرگانییەکان بۆ ئەوەی قەبارەی بازرگانی ئێستا بۆ ٢٠ ملیار دۆلار ساڵانە بەرزبکەنەوە”.
