ڕۆژی شەممە، بڕیاربوو لە نیویۆرک وەزیرانی دەرەوەی وڵاتانی کەنداو و عێراق لەگەڵ ئێران کۆببنەوە، بەڵام سەرچاوە ئاگادارەکان ئاشکرایان کرد کە کۆبوونەوە “مێژوویی” ییەکە لە کۆتا خولەکدا شکستی هێنا.
ماڵپەری ئەمواج میدیا کە بنکەکەی لە بەریتانیایە و تایبەتە بە پشکنینی پەیوەندییەکانی نێوان ئێران و عێراق و وڵاتانی کەنداو، لە زاری سەرچاوەیەکی دیپلۆماسییەوە ڕایگەیاندووە، “هەندێک لە وڵاتانی ئەندامی ئەنجومەنی هاوکاری کەنداو گومانیان لە ئامانج و کاتی دانیشتنەکە دەردەبڕن”.
بڕیاربوو ڕۆژی شەممە ئەنتۆنیۆ گۆتێرێس سکرتێری گشتی نەتەوە یەکگرتووەکان سەرۆکایەتی دانیشتنەکە بکات، بەڵام پەرەسەندنی ململانێکانی نێوان عێراق و کوێت ئەو هەوڵانەی ڕاگرت.
سەرچاوەیەکی دیپلۆماسی ڕایگەیاندووە، بڕیاربوو دانیشتنەکە بەگوێرەی بڕیارنامەی ژمارە ٥٩٨ی ئەنجومەنی ئاسایشی نەتەوە یەکگرتووەکان بەڕێوەبچێت، تێیدا داوای دامەزراندنی گفتوگۆییەکی ناوچەیی بە سەرۆکایەتی ئەمینداری گشتی نەتەوە یەکگرتووەکان دەکرد.
