قائیمقامیەتی سلێمانی داخستنی مارکێتێکی بڵاوکردەوە، لە لایەن لیژنەکانی قائیمقامیەتی سلێمانی مارکێتی چرۆ داخرا، بەهۆی فرۆشتنی جگەرەی ئەلیکترۆنی بە منداڵی خوار تەمەنی ١٨ ساڵ.
ئەمڕۆ شەممە، لەسەر سکاڵای هاووڵاتیان و بەهۆی فرۆشتنی جگەرەی ئەلیکترۆنی (ڤایپ) بە مناڵی خوار تەمەنی ١٨ ساڵ، قائیمقامی سلێمانی لیژنە هاوبەشەکان مارکێتی چرۆ لە گەڕەکی ئیبراهیم ئەحمەد داخست و خاوەنەکەشی رووبەڕووی رێکاری یاسایی دەکرێتەوە.
یاسا رێگری له فرۆشتنی جگه‌ره، جگه‌ره‌ی ئه‌لیكترۆنی (ڤایپ)، نێرگه‌له و خواردنه‌وه كهولییه‌كان به منداڵی نەوجەوان و خوار تەمەنی ١٨ ساڵ کردووە.
لە بڵاوکراوەکەدا ئەوەش هاتووە، پێویسته خاوەنی هۆڵەکانی بلیارد، کافتریا و کۆفی شۆپی نێرگەلە کێشان، شوێنی خواردن و خواردنەوە کهولییەکان ڕێگری لە منداڵانی خوار تەمەنی ١٨ ساڵ بکەن بۆ شوێنەکانیان و هیچیان پێنه‌فرۆشن، بەپێچەوانەوە لەلایەن قائیمقامیەتی سلێمانییەوە شوێنەکانیان دادەخرێت و خاوەنەکانیشیان روبەڕوی رێکارە یاساییە توندەکان دەکرێتەوە
