د.نەرمین معروف غفور ئەندامی لیژنەی دارایی لەپەرلەمانی عێراق ڕایگەیاند، شاندێکی وەزارەتی نەوتی عێراق لەگەڵ کۆمپانیای سۆمۆ کۆبوونەوە و ڕێککەوتون لەسەر دابینکردنی نەوت و بەرهەمە نەوتییەکان بەنرخی پاڵپشتیکراوی عێراق بۆ هەرێمی کوردستان،
د.نەرمین ئاماژەی بەوەشدا، لە بەردەوامی بەدواداچوونەکانی لیژنەی دارایی پەرلەمانی عێراق بۆ پرسی بودجەو پشکی هەرێم وچارەسەرکردنی کێشەی موچەی فەرمانبەران ئەمڕۆ پێنجشەممە ٢٠٢٣/٩/١٤ لیژنەی دارایی لەگەڵ بەڕێوەبەری کۆمپانیای سۆمۆ و شاندێکی وەزارەتی نەوتی عێراق کۆبوونەوەی سازکرد.
ڕاشیگەیاند، شاندی وەزارەتی نەوت ئاماژەیاندا بەوەی لەگەڵ هەرێم رێکەوتوون لەسەر دابینکردنی پێداویستی هەرێم لە سووتەمەنی و بەرهەمە نەوتییەکان بە نرخی پاڵپشتیکراو هاوشێوەی پارێزگاکانی تری عێراق.
نرخی نەوت و بەرهەمە نەوتییەکانی وەک گاز و بەنزین، لەنێوان هەرێم و عێراقدا جیاوازییەکی زۆر هەیە و هەوڵەکانیش بۆ هاوتاکردنەوە و دابینکردنی سوتەمەنی بۆهەرێم بەنرخی عێراق بەردەوامە، و بەپیی ئەم وتانەی د. نەرمین بێت لەئایندەیەکی نزیکدا نرخی سوتەمەنی و بەرهەمە نەوتییەکان لەهەرێم ڕوو لەدابەزین دەکات، هاوشێوەی پارێزگاکانی تری عێراق.
