هاوسەرۆکی شارەوانیی قەندیل ڕایدەگەیەنێت، ئێوارەی ئەمڕۆ ئۆتۆمبێلێکی بارهەڵگر لەبەردەم بینای شارەوانیی قەندیل بۆردومان کرا و زیان بە باڵەخانەی شارەوانی گەیشتووە، بەڵام هیچ زیانی گیانی نەبووە.
دڵشێر ئیبراهیم، هاوسەرۆکی شارەوانیی قەندیل بە ڕووداوی ڕاگەیاندووە، شۆفێری بارهەڵگرەکە، ئۆتۆمبێلەکەی لە نزیک شارەوانیی قەندیل ڕاگرتووە و جێی هێشتووە، بۆیە تەنیا زیان بە ئۆتۆمبێلەکە و باڵەخانەی شارەوانیی قەندیل گەیشتووە.
ئاشكراشی كردووە، بەهۆی بۆردومانەکەوە تانکیی گازی ئامێرەکانیان ئاگری گرتووە و زیان بە بینای شارەوانی و دەوروبەری گەیشتووە، بەڵام لە بۆردومانەکەدا هیچ کەسێک گیانی لەدەستنەداوە.
فڕۆكەی بێ فڕۆكەوان و فڕۆكەی جەنگی توركیا بە بەردەوامی ناوچەكانی هەرێمی كوردستان بۆردومان دەكەن و بەهۆیەوە تا ئێستا چەندین كەسی مەدەنی كوژراون و زیان بە چەندین خانوو و باخی هاووڵاتیان گەیشتووە.
لە ماوەی ڕابردووشدا فڕۆكەی بێ فڕۆكەوان لە سنووری شارباژێڕ بۆردومانی ئۆتۆمبێلێكیان كرد، كە چەند كارمەندێكی كۆمپانیای ئاسیاسێل-ی تێدابوون و بەهۆیەوە چەند كەسێك گیان لەدەستدا.
