بەڵگەنامەیەکی ئیسرائیلی ئاشکرای دەکات پیاوێکی جولەکە چەند ساڵێك بانگبێژ و پێشنوێژی مزگەوتی گەورەی نجامینای پایتەختی چاد بووە.
بە پێی بەڵگەنامەکە کە مێژووەکەی بۆ 61 ساڵ لەمەوبەر دەگەڕێتەوە و بەمدواییە ئەرشیفی دەوڵەتی ئیسرائیل بڵاویکردووەتەوە، جۆرج حەمدانی کە جولەکەیەکی بە ڕەچەڵەك ئێرانی بووە، دوای گەیشتنی بە نجامینا دەبینێت مزگەوتی گەورەی شارەکە بانگبێژ و پێشنوێژی نەبووە.
بە پێی بەڵگەنامەکە کە ئێرێ لاڤی دیپلۆماتکار و بەرپرسی ئەوکاتی باڵیۆزخانەی ئیسرائیل بۆ وەزارەتی دەرەوەی ئیسرائیلی ناردووە، حەمدانی خۆی وەك موسڵمان ناساندووە و پێشنیازی کردووە ئەو کەلێنەیان بۆ پڕ بکاتەوە، بۆیە رۆژانە جولەکەکە لەکاتی بانگدا موسڵمانەکانی بانگهێشتکردووە بۆ نوێژ و ڕۆژانی هەینیش وتاری بۆ داون.
ئەم کارەی کابرای جولەکە تا ساڵی 1943 بەردەوام بووە، بەڵام لەناکاو لە هاتووچۆکردنی مزگەوت دابڕاوە تا بەجۆرێک لە جۆرەکان خەڵکی ناوچەکە بۆیان دەردەکەوێت کە بانگبێژ و پێشنوێژەکەیان جولەکەیە نەك مسوڵمان.
لەو ماوەیەشدا هاوسەرگیری لەگەڵ ژنێکی موسڵمانی چادی کردووە و حەوت منداڵی لێی بووە.
بە پێی بەڵگەنامەکە، ئاشکرابوونی مەسەلەی کابرای جولەکە هەڵایەکی زۆری دروستکردووە، بەڵام بە هۆی ئەوەی کەسێکی دەوڵەمەند و بەهێز بووە، لە چاد ماوەتەوە و پاش ماوەیەكیش بابەتەکە لەبیرکراوە.
تەنانەت هەندێك کەس دانیانناوە بەوەی ساڵانێك کابرای جولەکە ڕۆڵی لە خزمەتکردنی ئایینی ئیسلامدا هەبووە.
