ئێلهام ئەحمەد، سەرۆکی جێبەجێکاری “ئەنجومەنی دیموکراتی سوریا”، باڵی سیاسی “هێزەکانی سوریای دیموکرات” ڕایگەیاند، ئەو پێکدادانانەی کە لە ڕۆژهەڵاتی سوریا لە لادێکانی پارێزگای دێرەزۆر ڕوودەدەن، بێ پلان نییە، و بەڵگەیان هەیە لەسەر تێوەگلانی میلیشیاکانی سەر بە ئێران و حکومەتی سوریا کە هاوکاری تێکدانی دۆخی ئەو ناوچانە دەکەن.
هێزەکانی “هەسەدە” قەدەغەی هاتوچۆیان لە ناوچەکانی ژێر دەسەڵاتی خۆیان لە لادێکانی ڕۆژهەڵاتی دێرەزۆر سەپاند و ئەمڕۆ شەممە کەوتە بواری جێبەجێکردنەوە و بۆ ماوەی 48 کاتژمێر بەردەوام دەبێت، بەهۆی تێکچوونی دۆخی ئارامی ئەو ناوچانە و بەرپابوونی شەڕ.
ئیلهام ئەحمەد لەتۆری کۆمەلایەتی ئێکس نوسینێکی بڵاوکردەوە و تێیدا هاتووە،”بەداخەوە ئەم شەڕە بێ پلانی دەرەکی نییە و بەڵگەمان هەیە کە گرووپە چەکدارەکانی سەر بە ئێران و سوریا تێوەگلاون و ئامانجیان تێکدانی سەقامگیری ئەو ناوچانەو کاری نایاساییە لەناوچەکەدا،هەروەها ئاماژەی بەوەشداوە ئەو وەک سەرکردەیەک لە ئەنجومەنی بەڕێوەبەری ( مسد )، ئەرکی ئەوانە تیشک بخەنە سەر ئەو خاڵانەی کەبوونەتە هۆی هەڵگیرسانی شەرەکە و تێکدانی ئارامی ناوچەکە.
لەبەشێکی تری نوسینەکەیدا ئیلهام ئاماژە بەوەدەدات،”زۆر گرنگە کۆمەڵگای نیودەوڵەتی و هێزەکانی ناوچەکە لەوە تیبگەن، کە ئێران و ڕژێمی ئەسەد مەبەستیانە وای نیشان بدەن کە ئەم ڕووداوانە هۆکاری ناکۆکی نیوان کوردەکان و عەرەبەکانی ناوجەکەن و ئەوان ناکۆکی گەورەیان هەیە، ئەمانەش بۆ لادانی سەرنجەکانە لەسەر ئەو پێشێلکاری و دەستدرێژیانەی کە سوپای سوریا لەو ناوچانە دەیکەن.
هاوکات زانیارییەکان ئاماژە بەوە دەدەن ئێران و سوریا ڕێککەوتون و دەیانەوێت هێزەکانی ئەمریکا لەناوجەکە بکشێنەوە تاوەک و گۆرەپانەکە بۆ خۆیان واڵابێت.
لەدوای گرژیی و ئالۆزییەکانی ئەم چەند ڕۆژەی ڕۆژئاوا، ئەمە یەکەم جارە و بەفەرمی سەرکردەیەکی کورد پەنجەی تۆمەتی ئاشکرا بۆ ئێران و سوریا دریژ بکات و بەراستەخۆ تۆمەتباریان دەکات بە تێوەگلان لەو شەرە.
