بەیانی ئەمڕۆ خالید بورهان، بەڕێوەبەری گشتی تەندروستی سەلاحەدین ڕایگەیاند، لەڕووداوێکی هاتووچۆدا لە ڕێگەی نێوان قەزای دوجەیل سامەڕادا ١٦ زیارەتکار گیانیان لەدەستداوە و ١٣ی دیکەش برینداربوون.
ئاماژەی بەوەکردووە، دۆخی هەندێک لە بریندارەکان ناجێگیرە و زۆربەی ئەو زیارەتکارانەش زیارەتکاری ئێرانین و بۆ بەشداری لە چلەی ئیمام حسێن سەردانی عێراقیان کردووە.
بەڕێوەبەری تەندروستی سەلاحەدین باسی لەوەکردووە، دوابەدوای رووداوەکە بریندارەکان گواستراونەتەوە بۆ نەخۆشخانەکان و چارەسەری پێویستیان بۆ کراوە. وتیشی، وەفاتنامە بۆ مردووەکان دەرکراوە و دەگەڕێنرێنەوە زێدی خۆیان.
