بە هۆی هەورە بروسکەوە ئاگر لە چەند گوندێکی سنووری ناحیەی گەرمك سەر بە قەزای پێنجوێن کەوتەوە.
ئەمڕۆ چوارشەممە، بەڕێوەبەرایەتی پۆلیسی دارستان و ژینگەی پارێزگای سلێمانی ڕایگەیاند، بەهۆی هەورەبروسکەوە ئاگر لە سنووری گوندەکانی شێرە، میشاو، نەرمەڵاس، بایەڵان و سریسانی سەر بە ناحیەی گەرمك کەوتەوە.
ڕوونیشیکردەوە، ئاگرەکە بووە هۆی سووتانی زیاتر لە سێ هەزار دۆنم دارستانی سروشتی و پووش و پاوان.
پۆلیسی دارستان ئەوەشیخستەڕوو کە سەختیی شوێنەکە ئاستەنگی بۆ تیمەکانی ئاگرکوژێنەوە دروست کرد، بەڵام دواجار بە هاوکاری هاووڵاتیانی سنوورەکە توانیان ئاگرەکە کۆنتڕۆڵ بکەن.
