وەزارەتی تەندروستی حکومەتی هەرێم لەڕاگەیەندراوێکدا بڵاویکردەوە، بەهۆی سەرپێچی لە مامەڵەکردن لەگەڵ منداڵێکی تازە لەدایکبوو، و هەروەها نەبوونی مەرج و ڕێکاری کارکردن لەنەخۆشخانەیەکی هەولێر، سزای دوورخستنەوەی بۆ دوو کارمەندی ئەو نەخۆشخانەیە و پێبژاردنی بۆ نەخۆسخانەکە دەرکرد.
لەکاتێکدا کەسووکاری ئەو منداڵە کەمێک پێش ئێستا لەکۆنگرەیەکی ڕۆژنامەنووسیدا رایانگەیاند ، “ئەو کارمەندە کەسی خۆمانە و دەستکاری ڤیدیۆکە کراوە و بەوجۆرە نییە کە بڵاوبۆتەوە”.
پاش کەمێک لەو کۆنگرەیە وەزارەتی تەندروستی بڵاویکردەوە سزای ئەو نەخۆشخانەیە و کارمەندەکانیان داوە،
ئەمەش دەقی ڕاگەیەندراوەکەی وەزارەتی تەندروستی:
دوابەدوای بڕیاری وەزارەتی تەندروستی بۆ گرتنەبەری ڕێكاری یاسایی بەرامبەر گرتە ڤیدیۆیەكی پێشێلكردنی مافی منداڵێكی تازە لەدایكبوو لە نەخۆشخانەی ( اربیل ئینتەرناشناڵ)ی ئەهلی.
وەزارەتی تەندروستی لەڕێگەی تیمی پشكنین و بەدواداچوون سەردانی مەیدانی نەخۆشخانەی ناوبراویان كرد بۆ بەدواداچوونی ئەم دیاردەیە، بەپێی ڕاپۆرتی ژمارە (١١٢) لە ڕێكەوتی ٢٠٢٣/٨/٢٠ و پاڵپشت بە یاسای مافی نەخۆش ژمارە ٤ ی ساڵی ٢٠٢٠ و ڕێنمایی جێبەجێكردنی ڕێنمایێەکانی وەزارەتی تەندروستی ژمارە ٤ ی ساڵی ٢٠٢٢ و ڕاسپاردەكانی لیژنەی بەدواداچوون بڕیار درا بە:
١- دوورخستنەوەی هەردوو كارمەندی نەخۆشخانە بە ناوەكانی (گ.ع.ع) و (س.ص.م) لە نەخۆشخانەی ناوبراو، سەڕەڕای نەبوونی ڕێگەپێدانی كاركردنی ئەم دووكارمەندە لە لیستی نەخۆشخانە.
٢- سڕكردن و لەكار ڕاگرتنی هەردوو كارمەندی ناوبراو لە كاركردن لەبواری پزیشكی و تەندروستی بۆ ماوەی شەش مانگ.
٣- داخستنی بەشی منداڵە ناكامەكان ( خدج) لە نەخۆشخانەی ناوبراو بەهۆی نەبوونی مەرجی تەندروستی تا ڕێكخستنەوە و پەیڕەوكردنی مەج و ڕێنماییەكانی تەندروستی.
٤- داخستن و ڕاگرتنی نەشتەرگەری منداڵبوون تا جێبەدجێكردنی بڕیاریەکانی خاڵی سێیەم.
٥- سزای بەڕێوبەر و نەخۆشخانە بەپێی ڕێنمایی پێبژاردنی سەرپێچی.
٦- سزای ئاگاداركردنەوە (انذار) ی بەڕێوبەری نەخۆشخانە بۆ كاركردنی پزیشكان و كارمەندان و فەرمانبەرانی نەخۆشخانە بەپێی لیستی ڕێگەپێدرا و لە وەزارەتی تەندروستی.
٧- هەواڵەکردنی دۆسیەی سەرپێچی کردن و پێشێلکردنی مافی نەخۆش بۆ دادگای تایبەتمەند.
