پەرلەمانتارێكی كورد دەڵێت، بانكی ناوه‌ندی عێراق نیگه‌رانه له به‌قاچاخبردنی دۆلار له دەروازەی ئیبراهیم خه‌لیلە‌وه و داوای لە حكومەتی هەرێم كردووە کۆتایی پێ بهێنێت.
بڕ‌یار ره‌شید، ئه‌ندامی ئه‌نجومه‌نی نوێنه‌رانی عێراق ڕایگەیاند، له كۆبوونه‌وه‌ی لیژنه‌ی ئابوری و پیشه‌سازی و بازرگانی ئەنجومەنی نوێنەران له‌گه‌ڵ عەلی عەلاق پارێزگاری بانكی ناوه‌ندی ئاماژەی بەوەکرد، ڕۆژانە بڕ‌ێكی زۆر دۆلار له خاڵه سنوورییه‌كانی هه‌رێمی كوردستانه‌وه بەقاچاخ ده‌برێته توركیا و له‌وێشه‌وه حه‌واڵه‌ی وڵاتانی دیكه ده‌كرێت، ئه‌مه‌ش هۆكارێكی سه‌ره‌كییه بۆ ناجێگیریی نرخی دۆلار له عێراق.
میدیای فەرمی یەكێتی لە ڕیگەی پەڕلەمانتارەکەیەوە ئەوەی خستەڕوو، “پارێزگاری بانكی ناوه‌ندی پێی ڕاگەیاندین له‌سه‌ر ئه‌و پرسه په‌یوه‌ندییان به حكومه‌تی هه‌رێمه‌وه كردوه و پێیان ڕاگه‌یاندوون كه پێویسته به‌قاچاخبردنی دۆلار له خاڵی گومرگی ئیبراهیم خه‌لیلەوە بۆ توركیا ڕابگرن و هاوكاری بانكی ناوه‌ندی بن بۆ جێگربوونی نرخی دۆلار”.
سەبارەت بە هەوڵەكانی بانكەكەش بۆ جێگیركردنی نرخی دۆلار ئەو پەرلەمانتارە باسی لەوەکرد، كاركردنی بانكی ناوه‌ندی بۆ جێگیركردنی به‌های دۆلار به دوو ئاڕ‌استه به‌رده‌وامه، كه خۆی له ئاسانكاری بۆ بازرگانان و به‌كارهێنانی سه‌كۆكان لەگەڵ توندكردنه‌وه‌ی خاڵه سنوورییه‌كان بۆ نه‌هێشتنی به قاچاخ بردنی دۆلار ده‌بینێته‌وه.
