بەرەبەیانی ئەمڕۆ نوسەرو شاعیری دیار و گەورەی کورد مامۆستا عەبدولکەریم شێخانی كۆچی دوایی كرد.
مامۆستا عەبدولکەریم شێخانی ساڵی ١٩٣٣ لە شاری کۆیە لە دایکبووە قوتابخانەی سەرەتایی و ناوەندی لە کۆیە تەواو کردووە، ساڵی ١٩٥٢ -١٩٥٣ بۆ تەواوکردنی خوێندنی قۆناغی ئامادەیی چووەتە هەولێر، ساڵی ١٩٥٣- ١٩٥٤ بۆ تەواو کردنی خولی پەروەردەیی چووەتە بەغدا یەکەم دامەزراندنی وەک مامۆستا لە گوندێکی گەرمیان بووە.
هەر لە منداڵییەوە حەزی لە خوێندنەوە بووە و بە (گۆڤاری گەلاوێژ) دەستی پێکردووە، توانای نووسین و وەرگێڕانی بە زمانی کوردی، عەرەبی و فارسی هەبووە.
دوای ڕێککەوتننامەی ١١ی ئاداری ساڵی ١٩٧٠بەشدارییەکی کارای لە وەرگێڕانی کتێبەکانی قوتابخانەی ناوەندی و ئامادەییەکاندا کردووە، چەندین نووسینی هەمەجۆری لە گۆڤار و ڕۆژنامە کوردییەکاندا بڵاوکردوەتەوە وەک چیرۆک، بابەتی زمانەوانی، سیاسی، کۆمەڵایەتی و ڕۆشنبیری، ڕۆمانەکەی نیکۆس کازانتزاکی (الاخوة العداء) ی کردووە بە کوردی و بەناوی (برا کوژی) بڵاویکردوەتەوە.
