بەپێی ڕێبەری خشتەی بەشە وانەکانی ساڵی نوێی خوێندنی ۲۰۲۳ـ۲۰۲٤ دەوامی خوێندكارانی پۆلی 1بۆ 6ی بنەڕەتی دەكرێتە بەیانیان و بریكاری وەزارەتی پەروەردەش ڕایدەگەیەنێت، كە ئاگاداری ئەوە نییە.
بەپێی ڕێبەری خشتەی بەشە وانەکانی ساڵی نوێی خوێندنی ۲۰۲۳ـ۲۰۲٤، كە وەزارەتی پەروەردە بۆ خوێندنگەكان دەریكردووە و دەست (خەڵك) كەوتووە، دەوامی ئەو خوێندنگایانەی یەك دەوامین بەیانیان لە كاتژمێر 8 دەستپێدەكات بۆ تاوەكو كاتژمێر 1:40 خوولەك و هەر وانەیەك 40 خوولەك دەبێت و پشووی نێوان وانەكان 10 خوولەك دەبێت.
هەر بەپێی خشتەكە، ئەو خوێندنگایانەی دوو دەوامین، پۆلەكانی 1 بۆ 6ی بنەڕەتی دەخرێنە دەوامی یەكەمی بەیانیان بۆ هەردوو وەرزی خوێندن و ئاڵوگۆڕ بە شێوازی دەوامەكەیان نەكرێت.
ڕوونیشی كردۆتەوە، دەوامی بەیانیان لە كاتژمێر 8 دەستپێدەكات بۆ كاتژمێر 12:25 خوولەكی نیوەڕۆ و ماوەی پشووی نێوان وانەكان 5 خوولەكە و هەر وانەیەك 40 خوولەك دەبێت.
بەپێی بڕیارەكە، ئەو خوێندنگایانەی دوو دەوامین، دەوامی خوێندكارانی پۆلی 7 بۆ 9ی بنەڕەتی دەخرێنە دوانیوەڕوان.
بۆ بەدواداچوونی زیانر (خەڵك) پەیوەندی كرد بە سامان سیوەیلی، وتەبێژی وەزارەتی پەروەردەوەو ڕایگەیاند، هەر شتێك لە پەیجی وەزارەتی پەروەردەوە بڵاوببێتەوە فەرمییە و ئەوەی لەوێوە بڵاونەكرێتەوە پەیوەندی بە ئێمەوە نییە.
لای خۆشیەوە، د. سەیوان عەلی، بریكاری وەزارەتی پەروەردەی هەرێم بۆ (خەڵك) وتی، “ئاگاداری ئەو بڕیارە نیم”.
