بەڕێوەبەری پەروەردەی ڕۆژئاوای سلێمانی ڕایدەگەیەنێت، بەهۆی بڵاوبوونەوەی جۆرە پەتایەك لە نێو باخچەیەكدا، تەواوی باخچەكە مۆڵەتیان بۆ ماوەی چەند ڕۆژێك پێدراوە تا چاك دەبنەوە، دەشڵێت: “بەفەرمی هیچ داواكارییەكمان بەدەست نەگەیشتووە داوای دواخستنی تاقیكردنەوەكان بكات بەهۆی پەتاوە”.
بەناز ڕەمەزان، بەڕێوەبەری پەروەردەی ڕۆژئاوای سلێمانی بۆ (خەڵك) ڕایگەیاند، لەماوەی چەند ڕۆژی ڕابردوودا لە نێو باخچەیەكی ساوایان، پەتایەك بڵاوبووەوە و مۆڵەت دراون تا هەموو چاك دەبنەوە.
ئاماژەی بەوەشكرد، بەپێی بڕیاری پەروەردەی گشتی سلێمانی، هەر خوێندنگە یان ناوەندێكی خوێندن پەتای تێدا بوو ئاگاداریان بكەنەوە و ڕێكاری پێویست دەگرینەبەر .
وتیشی،”لیژنەیەكی تەندروستیان هەیە سەردانی ئەو ناوەندانە دەكەن، كە پەتایان تێدا بڵاودەبێتەوە و ئەوان بڕیار دەدەن، كە پێویستی بە وەرگرتنی مۆڵەت هەیە لەو ناوەندەدا، هەر حاڵەتێكی لەو شێوەیە ڕووبدات ئاگادار دەكرێینەوە”.
ڕاشیگەیاند، هیچ ئامار و داتایەكمان لە ناوەندەكانی خوێندن بەدەست نەگەیشتووە، كە پەتا تێیدا تەشەنەی كردبێت و یەكێتی مامۆستایانیش بەفەرمی هیچ داوایەكی لەئێمە نەكردووە لەبارەی دواخستنی تاقیكردنەوەكانەوە.
