ئەندامێکی لیژنەی ئاسایش و بەرگری پەرلەمانى عێراق رایگەیاند، یاساى سەربازى زۆرەملێ لە عێراق بەم نزیکانە دەگەڕێنرێتەوە ناو پەرلەمان.
عەلی نەعمە بەنداری ئەندامى پەرلەمانى عێراق لە لیژنەى ئاسایش و بەرگرى، بە میدیا عێراقییەکانى راگەیاند، لەماوەکانی ڕابردودا بەمەبەستى خوێندنەوەی یەکەم بۆ پڕۆژەیاساکە کۆبوونەوەى پەرلەمان رێکخرا، بەڵام ناڕەزایەتیی هێزە سیاسییەکان و کەسایەتییە پەرلەمانییەکانى لێکەوتەوە.
هاوکات ئاماژەى بەوەکرد، “ئەوکات فراکسیۆنەکانى ناو پەرلەمان بیانوى ئەوەیان هەبوو، بە تێپەڕاندنى ئەم پڕۆژەیاسایە، حکومەتى عێراق پێویستی بە کەمپی مەشق و میکانیزمی رێکخراوەیی و کارگێڕی و بودجەیەکى زەبەلاح هەیە”.
ئەو ئەندامەى لیژنەى ئاسایش و بەرگرى پەرلەمانى عێراق وتى “یاساکە لەلایەن حکومەتەوە کشێنرایەوە بۆ ئەوەی جارێکى تر هەموارى بۆ بکاتەوە و دووبارە بیگەڕێنێتەوە بۆ ئەنجوومەنی نوێنەران”.
پڕۆژەیاساى سەربازى زۆرەملێ لەنێوان دوو بەرەدا دابەش بووە، بەرەیەک پشتیوانى دەکات بە ئامانجى ئەوەى گەنجان لە کاتە بەتاڵەکان دوور دەخاتەوە و جەستە و تەندروستییەکى باشیان ئەداتێ و وڵات پێش دەخات، بەرەیەکیش نەیارى پڕۆژەیاساکەن و بە شتێکى زیادەى دەزانن بۆ بودجەى گشتى عێراق.
