وەزارەتی شارەوانی ڕایگەیاند کە بە مەبەستی جێبەجێکردنی پرۆژەیەك لە سلێمانی. زەوییەکی ڕوکنیان بە نزیکەی یەك ملیار و 400 ملیۆن دینار فرۆشت.
ئەمڕۆ سێشەممە، وەزارەتی شارەوانی و گەشتوگوزار ڕایگەیاند، لە چوارچێوەی پرۆژە خزمەتگوزارییەكانی حكومەتی هەرێمی كوردستان بەمەبەستی پەرەپێدانی پرد و یەكتربڕ و شەقامەكانی شاری سلێمانی، ڕەزامەندیمان نیشاندا بە خەرجكردنی گوژمەی یەك ملیار و 348 ملیۆن و 977 هەزار دینار بۆ جێبەجێكردنی پرۆژە لە شاری سلێمانی.
ڕوونییشیکردەوە کە ئەو گوژمەیە لەسەر ڕێژەی (100%)ی داهاتی فرۆشتنی زەویی ڕوكنی شارەوانی لە سنووری سەرۆكایەتیی شارەوانیی سلێمانییە و لەسەر پلانی ساڵی 2023 ڕەزامەندی خەرجكردنی نیشاندرا.
وەزارەتەکە ئەوەشیخستەڕوو کە ئامانج لە فرۆشتنی زەوییەکە جێبەجێكردنی پرۆژەی ڕێكخستنەوەی یەكتربڕی ئەبو سەنا و بە دووسایدكردنی پردی ئەبوسەنایە لە سنووری سەرۆكایەتیی شارەوانیی سلێمانی.
