پێش نیوەڕۆی ئەمڕۆ لە ڕووداوێکی هاتووچۆدا لەسەر شەقامی بازنەیی مەلیک محمود لە شاریی سلێمانی ئوتومبیلێکی جۆری بارهەڵگر بەهۆی لەدەستدانی کۆنترۆڵەوە خۆی دەکێشێت بە (٧) حەوت ئوتومبیلی دیکەدا و بەهۆیەوە (٥) کەس برینداربوون.
دوابەدوای ڕووداوەکە تیمەکانی بەرگری شارستانی و پۆلیس و پۆلیسی هاتووچۆ و تیمە کانی تەندروستی گەیشتوونەتەشوێنی ڕووداوەکە و بریندارەکان ڕەوانەی نەخۆشخانە کراون کە شۆفێران و سەرنشینانی ئوتومبیلەکان بوون.
هاوکات، بەشێک لەسەرنشین و شۆفێرەکان لە شوێنی ڕووداوەکە چارەسەری سەرەتاییان بۆ کراوە و پێویستی نەکردووە ڕەوانەی نەخۆشخانە بکرێن، ئاماژە بەوەکراوە یەکێک لە بریندارەکان دۆخی تەندروستی ناجێگیرە و لەژێر چاودێری چڕی پزیشکیدایە.
سامان شێخ لەتیف لێپرسراوی ڕاگەیاندن و پەیوەندییەکانی بەڕێوەبەرێتی گشتی تەندروستی سلێمانی بەتۆڕی میدیایی خەڵکی ڕاگەیاند، لەڕووداوی هاتووچۆی ئەمڕۆی شاری سلێمانی( ٥) هاوڵاتی برینداربوو کە تەندروستی سەرجەمیان جێگیرە و لەچەند کاتژمێری داهاتوو (۳) لەبریندارەکان دوای وەرگرتنی چارەسەر ڕەوانەی ماڵەوە دەکرێنەوە .
