کونسوڵخانەی ئەمریکا ڕایگەیاند، پێشوازی لە ڕێککەوتنی پارتی و یەکێتی دەکات بۆ ئەنجامدانی هەڵبژاردنی پەرلەمانی کوردستان و یەکخستنەوەی هێزەکانی پێشمەرگە.
ئەمڕۆ دووشەممە، کونسوڵخانەی گشتی ئەمریکا لە هەولێر پەیامێکی بڵاوکردەوە و تێدا هاتووە کە پێشوازی لە ڕێککەوتنی پارتی دیموکراتی کوردستان و یەکێتیی نیشتمانیی کوردستان دەکەن بۆ ئەنجامدانی هەڵبژاردنی پەرلەمانی کوردستان و پشتیوانیکردنی هەوڵەکانی یەکخستن و چاکسازی لە هێزەکانی پێشمەرگەدا.
ڕاشیگەیاند کونسوڵخانەی ئەمریکا بە خۆشحاڵییەوە چاوەڕوانی بەرەوپێشچوونی کۆبوونەوە و دانوستانەکانی نێوان پارتی و یەکێتی دەکات بە جۆرێك کە لە بەرژەوەندی خەڵکی کوردستانی عێراق بکەوێتەوە.
دوێنێ هەردوو مەکتەبی سیاسی پارتی و یەکێتی لە دەباشان کۆبوونەوە و ڕایانگەیاند لەسەر ئەنجامدانی هەڵبژاردنی پەرلەمانی کوردستان و بەردەوامبوونی یەکخستنەوەی هێزەکانی پێشمەرگە ڕێککەوتوون.
