ئەمڕۆ یەک شەممە، د.سلێمان تامر، بەرپرسی ڕێکخراوی کوردستان بۆ مافی ئاژەڵان لە پارێزگای دهۆک، ڕزگارکردنی ورچێکی کێوی لە ناوچەکە ڕاگەیاند.
د.سلێمان تامر، بەرپرسی ڕێکخراوی کوردستان بۆ مافی ئاژەڵان ڕایگەیاند، هێزەکانی پێشمەرگەی پاراستنی ژینگە زانیارییان لەسەر بوونی ورچێك پێدرا، كە بارودۆخی لە مەترسیدابووە، دوای ئەوەی کەوتۆتە ناو تەڵەی ڕاوکردنەوە، ئەمەش وای لێکردوون دەستبەجێ بچنە شوێنەکە بۆ چارەسەركردنی.
دکتۆر سلێمان لە تۆمارێكی ڤیدیۆییدا لەگەڵ هێزەكانی پێشمەرگە دەرکەوت لەکاتی ئەنجامدانی ئۆپەراسیۆنی ڕزگارکردنی ورچەكە، بەو پێیەی ورچەکە تووشی برین لە سەر و سنگی بوو. دوای چارەسەرکردنی برینەکانی و پێدانی دەرمانی پێویست، لەگەڵ چاکبوونەوەیدا ئازادکرا.
