بەڕێوەبەری كۆمپانیای خۆراك لەپارێزگای سلێمانی ڕایگەیاند، دەستدەكرێت بە دابەشكردنی حەوتەم سەبەتەی خۆراكی ئەمساڵ بەسەر هاوڵاتییاندا و دەشڵێت، تائێستا هیچ ڕێنماییەك بۆ قەرەبووكردنەوەی بەشەخۆراكی هاوڵاتییان نەدراوە.
شەوكەت محەمەد، بەڕێوەبەری كۆمپانیای خۆراك لە پارێزگای سلێمانی ڕایگەیاند، دابەشكردنی شەشەم سەبەتەی خۆراكی ئەمساڵ بەسەر هاوڵاتییان لە قۆناغی كۆتاییدایە و لە چەند ڕۆژی داهاتوودا دەستدەكرێت بە دابەشكردنی حەوتەم سەبەتەی خۆراكی ئەمساڵ. وتیشی، هاوشێوەی مانگەكانی پێشوو هەمان ماددە خۆراكییەكانن کە دابەشدەكرێن.
ئاماژەی بەوەکردووە، ساڵی ڕابردوو تەنها بەشەخۆراكی یەك مانگ دابەشنەكراوە و تائێستا هیچ بڕیار و ڕێنماییەكیان لەلایەن حكومەتی عێراقەوە بۆ قەرەبووكردنەوەی هاوڵاتییان ئاڕاستە نەكراوە.
