چاوەڕوان دەکرێت لەڕۆژانی ئایندەدا دەنگدان بۆ بەپارێزگابوونی هەڵەبجە بخرێتە بەرنامەی کاری پەرلەمانی عێراقەوە. جێگری پارێزگاری هەڵەبجە دەڵێت، هیچ فراکسیۆنێکی عێراقی بە فەرمی دژایەتی بۆ بەپارێزگابوونی هەڵەبجە دەرنەبڕیوە و چاوەڕانن بە زۆرینەی دەنگ پەسند بکرێت.
رۆژی چوارشەممە 19ـی تەممووزی 2023، سۆران عومەر، سەرۆکی فراکسیۆنی کۆمەڵی دادگەری لە پەرلەمانی عێراق ڕایگەیاند ، لە کۆبوونەوەی رۆژی سێشەممە 18-7-2023ی سەرۆکی فراکسیۆنەکان لە پەرلەمانی عێراق بڕیاردرا بەپارێزگابوونی هەڵەبجە بخرێتە بەرنامەی کاری کۆبوونەوەکانی داهاتووی پەرلەمان عێراقەوە.
یەکێک لە نوێنەرانی پارێزگای هەڵەبجە لە پەرلەمانی عێراق وتی، خوێندنەوەی یەکەم و دووەم بۆ پڕۆژەیاسای بەپارێزگابوونی هەڵەبجە کراوە و تەنیا دەنگدان ماوە بۆ ئەوەی بە فەرمی ببێتە 19ـەمین پارێزگای عێراق: وتیشی، “بەهۆی خەبات و مێژووی هەڵەبجەوە پێم وانییە هیچ فراکسیۆنێک دژایەتی پڕۆژەیاساکە بکات و چاوەڕوان دەکرێت بە زۆرینەی دەنگ پەسند دەکرێت.”
رۆژی 9ى تەممووزى 2023، محەممەد تەمیم، وەزیرى پلاندانانی عێراق نەخشەى کۆتایی سنوورى کارگێڕیى قەزا و ناحیەکانى پارێزگاى هەڵەبجەى پەسند کرد، ئەوەش لە چوارچێوەى رێوشوێنەکان بۆ تەواوکردنى رێکارەکانى بەپارێزگاکردنى هەڵەبجە.
پڕۆژەیاسای بەپارێزگاکردنى هەڵەبجە كە بە بڕیاری ئەنجوومەنی وەزیرانی عێراق لە 13-3-2023 پەسندکرا.
پارێزگای هەڵەبجە لە قەزایەک و چوار ناحیە پێکهاتووە: قەزای ناوەندی هەڵەبجە و ناحیەکانی خورماڵ، بیارە، بەمۆ و سیروان، ژمارەی دانیشتووانی پارێزگاکە لەنێوان 126 بۆ 130 هەزار کەسدایە.
