کونسوڵخانەی ئەمریکا پیرۆزبایی لە هەردوو شاری هەولێر و ناشڤیل دەکات بە بۆنەی ئەوەی بوونە دەستەخوشك و جەختیش دەکاتەوە لەوەی ئەمریکا پابەندە بە بەهێزکردنی پەیوەندی لەگەڵ خەڵکی هەرێمی کوردستان.
ئەمڕۆ دووشەممە، کونسوڵخانەی ئەمریکا لە هەولێر پەیامێكی پیرۆزبایی ئاڕاستەی هەردوو شاری هەولێر و ناشڤیل کرد و تێیدا هاتووە: “خۆشحاڵین بەبیستنی دەنگدانی ئەنجوومەنی شاری ناشڤیل لەبارەی پەسەندکردنی پڕۆژەی دەستەخوشکی نێوان شاری ناشڤیل و شاری ھەولێر”.
ڕاشیگەیاند، چاوەڕوانی پەیوەندی و ھەماھەنگی زیاترین لە بوارەکانی کەلتور و پەروەردە و بازرگانی و بزنس لە نێوان ھەردوو شاردا.
کونسوڵخانەی ئەمریکا سوپاسی حکومەتی خۆجێی ھەولێر و شارەکانی دەستەخوشکی ناشڤیل و پەیمانگای کەلتوری کوردی ئەمریکی کرد بۆ بەردەوام کارکردنیان لەگەڵ ھەموو ھاوبەشەکان بۆ بەفەرمیکردنی ئەم پەیوەندییە.
ڕاشیگەیاند، ویلایەتە یەکگرتووەکانی ئەمریکا پابەندە بە بەھێزکردنی پەیوەندی دوولایەنەی نێوان خەڵکی هەرێمی کوردستان و خەڵکی ئەمریکا لە ڕێگای بەرنامەکانی دەستەخوشکی نێوان شارەکانی ھەرێمی کوردستان و شارەکانی ئەمریکا.
