وەزارەتی دەرەوەی تورکیا ڕایگەیاند بڕیارە ئەمڕۆ هەرسێ وڵاتی تورکیا و سوید و فینلەندا لە بڕۆکسلی پایتەختی بەلجیکا بۆجاری پێنجەم کۆببنەوە و گفتوگۆی کێشە هەڵپەسێردراوەکانی نێوانیان و پرسی تیرۆر و ڕووبەرووبوونەوەی بکەن.
لەڕاگەیەندراوەکەدا ئەوەشخراوەتەڕوو، یانیس ستۆڵتنبێرگ سکرتێری گشتی ناتۆ بەشداری کۆبوونەوەکە دەکات و شاندی تورکیا پێکدێت لە هاکان فیدان وەزیری دەرەوەی تورکیا و ئیبراهیم قالن سەرۆکی دەزگای هەواڵگری تورکیا و عاکف تشاغتای گەورە ڕاوێژکاری سەرۆککۆمار و بوراک ئاکجابار جێگری وەزیری دەرەوە بەشداری کۆبوونەوە کە دەکەن.
بەگوێرەی زانیارییەکان، کۆبوونەوەکە پێداچوونەوە بە هەنگاوەکانی فینلەندا و سوید دەکات لە چوارچێوەی ڕەهەندە جۆراوجۆرەکانی بەرەنگاربوونەوەی تیرۆر ئەوەش بەگوێرەی یاداشتێکی پێشووی نێوانیان کە لە ئەنقەرە لە ١٤ی حوزەیرانی ٢٠٢٣دا واژۆی لەسەرکرا.
ئەوەشلەکاتێکدایە، تورکیا لەگەڵ سوید و فینلەندا لە کۆبوونەوەی لوتکەی ناتۆ لە مەدریدی پایتەختی ئیسپانیا لە ٢٨ی حوزەیرانی ٢٠٢٢دا یاداشتنامەیەکی سێ لایەنەی لەبارەی بەرەنگاربوونەوەی تیرۆر واژۆ کرد.
