وەزارەتی تەندروستیی هەرێمی کوردستان چەند ڕێنماییەکی تایبەت بە سەربڕینی ئاژەڵ و قوربانیکردن بڵاوکردەوە و دەڵێت، “سەربڕینی ئاژەڵان لە ماڵان بە هەموو شێوەیەک قەدەغەیە و دەبێت تەنها لەشوێنی ڕێگەپێدراودا ئاژەڵ سەرببڕدرێت.”
لە بڵاوکراوە نۆ خاڵییەکەی وەزارەتی تەندروستی دا ڕێنمایی هاوڵاتیان دەکات لەکاتی سەربڕینی ئاژەڵ و قوربانیکردن پەیڕەوی بکەن، لە یەکێک لە خاڵەکاندا هاتووە، قەسابەکان دەبێت پابەند بن بە لەبەرکردنی کەلوپەلی خۆپاراستن، بەتایبەت لەبەرکردنی دەستکێشی لاستیک و جلی تایبەتی خۆپارێزی لەکاتی مامەڵەکردن لەگەڵ ئاژەڵ یان گۆشت و خوێنەکەی بەشێوەیەکی تەواو، “لەکاتی سەرپێچی بە تووندی سزا دەدرێن.”
لە یەکێک لە خاڵەکاندا ئاماژە بەوە کراوە، دەبێت جلی قۆڵ درێژ و رەنگ کاڵ لەکاتی سەردانیکردنی ئەو شوێنانە لەبەربکرێت کە “گەنەیان تێدا بڵاوە،” هەروەها بەکارهێنانی کرێمی تایبەت بە دوورخستنەوەی مێروو و گەنە. لە کۆتایی خاڵی پێنجەم رێنوێنیی وەزارەتی تەندروستیدا هاتووە، گۆشت دەبێت بۆ ماوەیەک بکوڵێندرێت کە “لە 30 چرکە کەمتر نەبێت.”
ئەم ڕێنماییانەی وەزارەتی تەندروستی ، لەپای ئەو مەترسییانەیە کە لەماوەی ڕابوردودا بەهۆی بڵاوبوونەوەی ڤایرۆسی تای خوێنبەربوون چەند کەسێک گیانیان لەدەستداوە و ، بۆڕێگریکردن لەبلاوبوونەوەی زیاتری ئەم نەخۆشییە ، بەتایبەت لە جەژنی قورباندا ، ڕێکارەکانی خۆپارێزی زۆر توند کراونەتەوە و تەندروستی هەرێم سزای قورسی سەرپێچیکارانیش دەدات.
