ئەو زانیارییانە ناڕاست دەرچوون کە لە میدیای عێراقدا سەبارەت بە سەردانی ڕەجەب تەیب ئەردۆغان سەرۆکی تورکیا بۆ عێراق و هەرێمی کوردستان بڵاوکرابوونەوە.
چەند ڕۆژێکە ژمارەیەك ماڵپەڕی عێراقی دەنگۆی ئەوەیان بڵاوکردووەتەوە کە ڕەجەب تەیب ئەردۆغان، سەرۆکی تورکیا دێتە عێراق و لەو چوارچێوەیەشدا سەردانی هەرێمی کوردستان دەکات.
بە پێی ئەو بانگەشانەی ماڵپەڕەکان بڵاویانکردبووەوە، دەبوو ئەمڕۆ یەکشەممە، ئەردۆغان لە عێراق بووایە.
بەڵام سەرچاوەیەکی حکومەتی عێراق ئەو زانیارییانەی ڕەتکردەوە و جەختیکردەوە کە هیچ پلانێکی لەو جۆرە لەئارادا نییە.
هاوکات ماڵپەڕی فەرمی سەرۆکایەتی تورکیاش، کە خشتەی چالاکییەکانی ڕۆژانەی ئەردۆغان بڵاودەکاتەوە، هیچ شتێکی لەبارەی پلانی سەردانی سەرۆکی تورکیا بۆ عێراق بڵاونەکردووەتەوە.
