سەرۆکی شیشان، رەمەزان قادیرۆڤ گرووپی ڤاگنەر کە هەوڵی یاخیبوونیان داوە لە دژی ئیدارەی ڕووسیا بە ناپاک تاوانبارکرد و پاڵپشتی خۆی بۆ ڤلادیمیر پوتین سەرۆکی ڕووسیا دووپاتکردەوە.
قادیرۆڤ لە پەیامێکیدا لە هەژماری خۆی لە تێلێگرام رووداوەکانی بە “لێدانی چەقۆ لە پشتی (ڕووسیا)” و “یاخیبوونێکی راستەقینەی سەربازیی” وەسفکرد.
سەرۆکی شیشان جەختی لەوە کردەوە کە خاوەنی فەرماندەیەکی باڵان کە لەلایەن خەڵکەوە هەڵبژێردراوە و وتی: “پوتین لە گوتارە نیشتمانییەکەیدا رووداوەکانی بە ‘یاخیبوونی سەربازیی’ ناوبرد، بە تەواوەتی پاڵپشتی ناوەڕۆکی گوتارەکەی پوتین دەکەم”.
رەمەزان قادیرۆڤ ئاماژەی بەوە کرد کە دامەزرێنەری ڤاگنەر، یەڤگینی پریگۆجین “ناپاکە” و وتی: “ئەوەی روویداوە بەرهەڵەستییە لە دژی دەوڵەت و دەبێت هەموو کەس لە دژی ئەم بەرهەڵستییە لە چواردەوری سەرکردەی نیشتمان (پوتین) یەکبگرێت. یەکەکانی سەربە وەزارەتی بەرگریی و گاردی نیشتمانیی کە لە کۆماری شیشیان جێگیرکراون بەرەو ناوچەکە بەڕێکەوتن، لە پێناو پاراستنی یەکێتی و دەوڵەتی ڕووسیا هەموو کارێک دەکەین، دەبێت ئەو یاخیبوونە سەرکوت بکرێت، ئەگەر بۆ ئەنجامی ئەمە پێویست بە رێوشوێنی توند هەبێت ئەوە ئێمە ئامادەین”.
