هێزە ئەمنییەکان کەسێکیان بە تۆمەتی دروستکردنی ئەو ئاگرە دەستگیرکرد کە سووتانی دەیان دۆنمی لە سنووری ناحیەی سیتەکی سەر بە سلێمانی لێکەوتەوە.
ئەمڕۆ یەکشەممە، بەڕێوەبەرایەتی پۆلیسی دارستان و پاراستنی ژینگەی پارێزگای سلێمانی ڕایگەیاند، ئاگرێک لە گوندی (کانی وەیسە و تەگەران)ی سەر بە ناحیەی سیتەک کەوتەوە.
ڕووننیشیکردەوە کە بەهۆی بوونی با و پوش و پاوانی زۆر، بە زەحمەت و بە چەند کاتژمێرێک توانرا ئاگرەکە کۆنترۆڵ بکرێ.
پۆلیسی دارستانی سلێمانی ئەوەشی خستەڕوو کە بە هۆی ئاگرەکەوە نزیکەی ٧٠ دۆنم پوش و پاوان و دارستان سووتا.
ڕاشیگەیاند، هێزە ئەمنیەکان توانیان تۆمەتبارێک لە دەوروبەری ئاگرەکە دەستگیر بکەن بە تۆمەتی خستنەوەی ئاگرەکە و لەلایەن بنکەی پۆلیسی دارستانی سیتەك پەڕاوی لێکۆڵینەوەی بۆ ڕێکخرا و بە فەرمانی دادوەر ڕاگیرا .
