دواخستنی مووچەی مانگی 5ی مووچەخۆرانی هەرێم و ڕۆژانە دابەشكردنی مووچەی تەنها وەزارەتێك لەكاتێكدا جەژنی قوربان نزیك بۆتەوە، ناڕەزایی سەرجەم مووچەخۆران و چین و توێژەكانی لێ كەوتۆتەوە و پەرلەمانتارێك دەڵێت: “بۆ قوتی خەڵك دوا ئەخەن؟”.
بەپێی بڕیاری حكومەتی هەرێم هەموو مانگێك دەبێت لە 25ی مانگەوە دەست بە دابەشكردنی مووچە بكرێت، بەڵام دوای نزیكەی 50 ڕۆژ دەست بە دابەشكردنی مووچەی مانگی 5 كراوە و هەر ڕۆژێك وەزارەتێك دەدرێت لەكاتێكدا حكومەتی عێراق 400 ملیار دیناری ناردووە بۆ مووچە و پارەی هاوپەیمانان، كە 30 ملیار دینارە، ئەمە جگە لە داهاتی ناوخۆ و پارەی فرۆشتنی نەوت لەناوخۆدا.
حكومەتی هەرێم مانگانە پێویستی بە نزیكەی 900 ملیار دینارە بۆ مووچە، بەڵام سەرباری 400 ملیارەكە و داهاتی ناوخۆ و هاوپەیمانان هێشتا دەڵێت: “زیاتر لە 300 ملیار دینار كورتهێنانی هەیە” كەواتە بەپێی قسەی حكومەت بێت زیاتر لە 600 ملیار دینار پارە بەردەستە، بەڵام ڕۆژانە یەك وەزارەت مووچە وەردەگرێت و تەنها هەفتەیەكیش ماوە بۆ جەژنی قوربان.
عومەر گوڵپی، ئەندامی پەرلەمانی كوردستان بۆ (خەڵك) ڕایگەیاند، دەبوو تا پێش جەژن مووچەی مانگی شەش بدرێت نەوەك پێنج!
وتیشی، “( ٤٠٠) ملیاری بەغدا و (٦٠٠) ملیاری داهاتی ناوخۆی مانگی پێنج و نیوەی شەش لەبەردەستە، بێجگە داهاتی نەوت بە تەنكەر، بۆ قوتی خەڵك دوا ئەخەن؟”.
