سەرۆكی پەرلەمانی كوردستان دەربارەی پەسەند كردنی یاسای بودجەی گشتی عێراق پەیامێكی بلاوكردەوە و ڕایگەیاند، بەشی زۆری ئەو شەڕەی بردتانە بەغدا و کەس تێیدا سەرکەوتو نەبوو، دەشڵێت: ” لێرە گۆشتی یەکتریشمان بخواردایە ئێسقانی یەکتریمان نەئەشکاند”.
د. ڕێواز فایەق، سەرۆكی پەرلەمانی كوردستان لە پەیامەكەیدا ئاماژەی بەوەكردووە،بودجەی گشتی عێراق پەسەندکرا، پیرۆزبێت لەو وڵاتەی، کە لە خراپترین دۆخیشدا دامەزراوەکانی بەپێی دەستور و یاسا بەرکارەکان ئەرکی خۆیان جێبەجێ دەکەن، ئیرادەی سیاسی چەندە ناجۆر و ناسازیش بێت ئاڕاستەی کاری دامەزراوەیی ناگۆڕێت، سەرباری تێبینی و کەموکوڕیش هێشتا خەڵک بە ئومێدەوە لە دامەزراوەکانی ئەڕوانێت.
ئاماژەی بەوەشکردووە، “لە هەرێمەکەی ئێمەش دوو خولی پێنج ساڵی پەرلەمان کۆتایی پێهات و پەرلەمان و پەرلەمانتاران بە پاساوی نالۆژیکی لە جێبەجێکردنی گرنگترین ئەرکیان مەحرومکران”.
ڕاشیگەیاندووە، “بەشی زۆری ئەو شەڕەی بردتانە بەغدا و کەس تێیدا سەرکەوتو نەبوو، دەبو لە پەرلەمانەکەی خۆمان بکرایە و کوڕ و کچەکانی خۆتان یەکلاییان بکردایەتەوە و بەڵێنەکانی هەڵبژاردنیان جێبەجێ بکردایە، لێرە گۆشتی یەکتریشمان بخواردایە ئێسقانی یەکتریمان نەئەشکاند”.
سەرۆكی پەرلەمانی كوردستان دەشڵێت: “هیچ مەكەن تەنها سەیری پڕۆسەی دەنگدان لەسەر گێڕانەوەی پاشەكەوتی مووچە بكەن، تێدەگەن چیمان بە قەوارەكەمان و بە هاووڵاتیانمان و بە خۆمان و بە دامەزراوەكانمان كردووە”.
